Conférence Episcopale du Rwanda - +250788784308 - @journal_KM - - @Kinyamateka

Musenyeri Antoine Kambanda na Musenyeri Vincent Harolimana batashye Shapeli yitiriwe mutagatifu Gerard



Amakuru ya Kiliziya 09/06/2019

Kuri uyu wa Gatanu tariki ya 7 Kamena 2019, hatashywe Kiliziya ya Shapeli yitiriwe Mutagatifu Gerard.  Iyi shapeli iherereye mu Murenge wa Bushoki, Akagari ka Nyirangarama mu Karere ka Rulindo, yatashywe ku mugaragaro na Arkiyepiskopi wa Kigali Musenyeri Antoine Kambanda ari kumwe na Musenyeri Vincent Harolimana, Umwepiskopi wa Diyosezi gatolika ya Ruhengeri. Iyi Shapeli yubatse ku gasozi ka Tare, ku mashuri azwi nka Collège Fondation SINA Gerard.Umuyobozi wa REB, Dr Ndayambaje Irene, ubwo yitabiraga umuhango wo gutaha ku mugaragaro, Shapeli yitiriwe Mutagatifu Gerard, yubatse muri College Fondation Sina Gerad, yavuze ko iyi Chapelle, ije gushimangira ubumuntu, maze asaba n’abandi bashoramari, kutirebaho cyane mu gutanga uburere n’ubumuntu.

Iyi Shapeli yubatswe n’umushoramari, akaba na rwiyemezamirimo Sina Gerard uzwi ku izina rya Nyirangarama, Dr Irene Ndayambaje abibonamo nko kubaka umuntu nyawe. Avuga ko Sina Gerard agira uruhare mu guteza imbere uburezi, amashuri ye atanga ubumenyi n’uburere. Akomeza avuga ko kubaka shapeli, ari kimwe mu bishimangira indangagaciro, kuko umunyeshuri azajya ava ku ishuri yubaha Imana, yubaha n’ababyeyi be akunda n’igihugu.

Sina Gerard we avuga ko yahisemo kubaka iriya Shapeli, ashingiye ku ijambo rya Mutagatifu Gerard, ndetse mu rwego rwo gushimira Imana yamutije ubuzima kandi ikamuha n’ibimutunga bihagije. Yavuze ko Imana yamuhaye byinshi. Ati:"Ndashimira umuryango wanjye nkunda kandi umperekeza muri gahunda nziza zanjye, inshuti z'umuryango, abihaye Imana twabanye muri uru rugendo, Imana yampaye ubutunzi nk’umukirisitu nakomeje kubaza Imana icyo nayitura kitari ukwikunda, nubaka amashuri, arera abana kandi agatanga akazi. Ariko nanone nshingiye ku ijambo rya Mutagatifu Gerard w’I Brogne, rigira riri “Bana banjye, ntimugaharanire ubukire uko bwaba bungana kose, ahubwo muharanire igikwiye cyujuje ubuziranenge. Nimwemere ibyo mbabwira, ubukire n’amakuzo ni byo byahanantuye abami n’ibikomangoma by’iyi si”. Akomeza avuga ko iri jambo ari ryo ryamwubatse ati:"Nzaharanira ko aho ntuye buri wese azamuka mu iterambere n’imibereho myiza”.

Arkiyepiskopi wa Kigali Musenyeri Antoine Kambanda, yishimira iki gikorwa cyo kubaka Ingoro kandi yizeza Sina ko ubusabe (bwerekeye gushyira abihayimana kuri iyi shapeli) bwe azabuzirikana. Musenyeri yaramushimiye cyane. Yagize ati: “ Sina Gerard afatanije n’Imana yubatse shapeli, iyi rero izabere inzira y’Abakirisitu kugira ngo basabane n’Imana, kandi n’abanyeshuri ba hano bazakure koko ari abanyarwanda bakunda Imana bayihesha icyubahiro, kandi biyumvamo kirazira n’indangagaciro z’umunyarwanda, binyujijwe mu gusenga. Iyi Ngoro rero izabibafashamo”.

Iyi shapeli yubatse ku gasozi ka Tare, ku mashuri azwi nka Collège Fondation SINA Gerard. Sina Gérard ni rwiyemezamirimo ufite ibikorwa byinshi mu Karere ka Rulindo harimo ibijyanye n’ubuhinzi, ubworozi n’uburezi. Sina Gerard  afite ibikorwa bitandukanye rero birimo amashuri y'incuke, abanza n'ayisumbuye. Mu cyerekezo cye afite gahunda yo kuzubaka Kaminuza. Kugeza ubu abiga mu ishuri yashinze bo mu mashuri y’inshuke biga batishyura ikintu nakimwe n'abandi nabo bigira ubuntu. Arihira abana benshi amashuri. Sina yatanze akazi ku baturage basaga 500 bahoraho n’abandi 700 ba nyakabyizi.

 

 

 


Tanga igitekerezo kuri iyi nkuru

KINYAMATEKA IRABATUMIKIRA

Ubutumire : Mpuzamiryangoremezo Mt Jeraridi

Cenetra Hotel

Missa kwa Sina, guha umugisha shapeli yitiriwe Gerard
UMUHANGO WO GUHEREKEZA MUSENYERI YOHANI DAMASENI BIMENYIMANA : Umwaka urashize
CEREMONIES D'OUVERTURE DIXIEME SESSION DES DIRECTEURS NATIONAUX DES OPM AFRIQUE
Umwaka w'Abiyeguriyimana 02.02.2019-25.03.2020
Cenaculum mu byishimo by'isabukuru y'ubusaserdoti
Isabukuru y'imyaka 37 Musenyeri Tadeyo ahawe inkoni y'ubushumba
Amasomo n'inyigisho, ku wa gatatu w'icyumweru cya 1 Gisanzwe C
Kwicara ku Ntebe ya Arkiyepiskopi muri Stade Amahoro i Remera
Yubile ya Padiri Herman ku mudugudu w'urubyiruko kuri Muhazi
Missa muri IFAK, UKWIGARAGAZA KWA NYAGASANI 2019
Urugo rw'i Nazareti, urugero rw'ingo zose n'abazituyemo
Inyigisho yatangiwe i Kibeho 28/12/2018